吐公單車徑（二）：毀容隧道

生手踩車落隧道，要打醒十二分精神。

孖橋有點似市集，有走鬼檔賣汽水、冰菠蘿，有阿叔間中攞檔補呔，有更多的人是唞氣搵路。若然是去大埔，唔好過橋，轉左就無錯喇！

首先見到是一條窄長的直路，左邊繼續是馬場，右邊則是沙田污水處理廠，政府早排做諮詢，問搬走污水廠入岩洞之後，塊地有乜用途。以現今當局的眼光，有地點會唔起樓，不過唔知是起豪宅定係公屋？

轉彎之後左邊有條天橋，唔晒理，繼續直行便會見到大老山公路高架橋，這裏有個紅綠燈，切記要按燈柱上的過路掣，否則會繼續紅公仔，有排過唔到。

過咗馬路便會見番吐露港，這裏亦是一個較大的休息點，有瓦遮蔭，有廁所去，有汽水買，建議在此小休，因為之後便是整條吐公單車徑最麻煩的路段──毀容隧道。

毀容隧道只是車友之間的戲稱，它是單車徑橫跨創新路的隧道，坡幅不大，但對一年只踩一、兩次單車的人而言，又似乎有點難度，問題出現在有些人太勇，落得太快；有些人太怯，落得太慢，於是前者失控時，撞牆撞前車甚至對面上斜中的單車，時有發生，一個月內，三、四個周末都會見到救護車停在隧道入口旁的馬路，由此可見經過這段路要小心謹慎。

毀容隧道後還有一條隧道，這條相對較短，過了便會見到科學園。