「你減吓肚腩，英俊好多！」

 

一個人去「痰仔」食中辣米線。風邪在身，吃了兩口已經面紅耳熱，鼻孔「索索」聲。

45秒後，一行五人的師奶步兵坐低我張枱。其中「首領阿嬋」坐低後，即不斷講剛才好累，花很多功夫才肯走，指住「阿姑甲」話你頭先透唔到氣，向「阿姑乙」講你一入去就面色白晒 …… 再講其他幾個阿姑因為「沖」，所以有不同反應。
一直做低頭族的我，心中不禁盤算這些阿姑莫非剛剛降魔伏妖？忍唔住抬頭望下這班師奶天師。「首領阿嬋」面色紅潤，天寒地凍僅穿釘珠片薄 Tee，真的似做完劇烈運動。另外四個要不面無血色，要不面目犁黑。我撞鬼的機會大點。
「首領阿嬋」講嘢睇落幾有份量：眾阿姑話唔識同仔女相處，俾人話煮餸唔好味 ……「首領阿嬋」都一語定音，眾阿姑係係係聲稱是。
食完，抹咀，一剎那之際與「首領阿嬋」四目交投，頓時感覺不安，連忙左手抹嘴、右腳起步想走。就在這一刻，「首領阿嬋」跟我說：
「先生，你 ……」
(你唔係想話我印堂發黑嘛? )
她續說：「你碗係幾辣呀？」
(啊，自我嚇親，原來係問碗面啫。)
我：中辣。
首領阿嬋：「見你食完塊面紅晒，你唔受得，下次食小辣吧！」
(妖！關你鬼事！感冒梗係唔受得辣啦！)
我(保持禮貌)：係既！
起身走人。甫轉身，首領阿嬋又叫住我：「先生！」
(今次唔係話 「你朋友未起身」下話！)
我回頭望佢。
「你做吓運動，減吓肚腩，健康好多，英俊好多 !」

(幾乎係女版「點jack」咁既聲！)

我再次係係聲不斷稱是，然後擒擒青擸袋速逃！
「首領阿嬋」講嘢真係好有份量，個個聽完都係係聲，扺佢做首領！

Follow us on Twitter @hkreadaily

Like us on Facebook http://on.fb.me/1vEMaS0